明周975期 1987/7/19

張學友羅美薇特殊的拍拖方式

約了張學友影相，影至七七八八，羅美薇上來探班，於是索性捉了羅美薇過來跟張學友合照。誰知今次二人「鬼咁順攤」，話影就影。
以前這兩條「扭紋柴」莫說拍合照，就是問吓兩人的拍拖狀況，二人也馬上提高警覺，顧左右而言他。難怪事後連他們也異口同聲的說：「我哋唔知點解會俾你哋影既呢﹗」大有「唔通撞邪」之態。
其實，撞邪是假，興奮是真。那天原來是張學友牛一，羅美薇要為拖友仔慶祝生辰，於是打扮得「鬼咁」靚來等我們完工，還帶了一大束花預備送給張學友，我們因利乘便拿了來作道具花(便是這輯相裏的那一束)。

拍拖的方式

「男朋友生日，只是送花咋？」存心逗逗羅美薇。
誰知她極認真地喊︰「平日送得太多啦，新年又送，聖誔節又送，復活節又送，情人節又送，送來送去。吔都送過晒，送到冇哂意義，所以，今年他生日，我決定吔都唔送，淨係送束花，而且，我生日他都冇送嘢俾我。」
「咁仲值得你送花俾佢？」
「不過，我知佢唔係有心忘記既，只是真係忙到唔記得暏。」
「真係咁忙？」
「佢真係好忙架，有目共暏喇，就算他生日，我哋都沒有時間像人家那樣兩個人撑枱腳，給你們影完相，一大班朋友說要為他慶祝生日，難道我自己一個人霸住哂佢，咁自私咩。」
那一大班朋友，足足有四枱人。在尖沙咀吃完飯後，已是凌晨點幾鐘，於是各自歸家。以為張學友送羅美薇時二人還有餘興節目，誰知翌日羅美薇說︰「冇呀，我哋都係各自返屋企咋，咁夜，仲去邊吖。」
「到底你哋有冇時間兩人相對架？」
「見面梗係有啦，而且仲時時見添。不過像人家那樣行街、睇戲、談心的約會就沒有了。」
這對小情人的拍拖方式可謂十分特殊矣，沒有約會，又何來見面機會？

從前的不是

「佢咁忙，那有時間約我行街、睇戲吖，不過，佢有車，放工的時候，碰巧我又做完嘢的話，他便來接我囉﹔假如我要去邊度，他又用車送我囉﹔一個星期他都會接送我很多次既。」
原來是汽車約會。
「係呀，我哋只係可以利用這些時間見面既咋。」
「豈不是毫無趣味可言？」
「咁又唔可以咁講既，佢真係好忙嘛，我知道佢既處境既。難道我會像其他女仔埋怨男朋友沒時間陪自已而亂發脾氣嗎？」講講吓，她自己也笑起上來。「不過，以前就會。」
羅美薇自承以前是個又刁蠻又任性的「壞」女孩，恃著自己年紀小(她兩歲半開始唸書，十七歲己預科畢業，十八歲入電影圈，年齡永遠比同圈子的人小幾歲)，永恃著是獨生女(家人都寵她)，常常到處給人家搗蛋，同一組戲的人，往往給她弄得啼笑皆非。
想起那些頑皮事，連她自己也忍不住說︰「唔知點解咁既人都有人追既呢？」
「不過，我想那時候，他(張學友)很怕我的。」
「為甚麼？」
「因為我連手指生倒剌都在片場呱呱嘈，是個麻煩透頂的人。」
「為甚麼他又會追你？」
「我都唔知點解。不過，我哋註定會好既。」羅美薇講得好好笑，原來他們第一次見面仲好笑。她說﹕
「拍『痴心的我』的時候，我們尚未認識﹔有一日公司要給我們拍造型照，看看效果如何。導演叫，『張學友、羅美薇，站在一塊，讓我睇吓登唔登對。』於是，我們兩個新丁馬上走出來站在一起。導演又叫︰『你哋互相對望一下。』我哋抬頭互相望了眼。彼此塊臉即刻紅晒，跟著，馬上低頭，轉身，分開。」

第一次約會

「從那刻觸電的感覺開始，我就知道我哋會好既嘞。」原來張學友是第一個男朋友。
「你哋兩個都咁怕羞，點開始第一次約會呀？」
「都不是什麼正式約會，不過大家彼此留意，多了一點心而已。有一晚收工，有個工作人員要送張學友回家，張學友突然跟那人說︰『不如送埋羅美薇啦﹗』我們才第一次走在一起，但都仲係有第三者。」
想不到由始至終都是汽車牽紅綫。
問她有沒有想過結婚？
她爽快說︰「有，很早已經想的了。十五、六歲的時候，已想在十八歲之前結婚，十八歲的時候，又想廿三、四歲結婚，現在，我想要到廿七、才結婚了。」
「你們有什麼計劃？」
「沒有呀，他現在咁忙。」
張學友又真的忙的交關，還有十多天便是演唱會，今年開足七場(聞說本來開十場，但有幾天檔期給譚詠麟佔去了)，現在，他已每天開始跑步練氣，假如各位有興趣見見這位怕羞仔，每天早上都可以在山頂碰見他汗流浹背的跑步。

PS還有幾遍舊明周在大學圖書館找的，如有人想看我再打吧。