2017年06月26日 蘋果日報
【大女攬外籍男】「佢哋文化係咁」學友：講love you好似講bye-bye咁

歌神張學友同老婆羅美薇育有兩女，近日16歲大女瑤華(Zoe)疑情竇初開，同外籍靚仔Mathis傳緋聞，流出攬攬相，而Mathis喺facebook竟然自爆已婚，「老婆」又唔係Zoe，件事相當奇怪，Mathis先留言示愛「I love u so much」，Zoe又回覆「I love u more」，似係喺網上放閃。

歌神張學友噚日喺大陸太原舉行完個唱，今日坐早機返港，班機喺早上11點40分到，過咗半個鐘，學友約12點半步出機場，一個人孭住個背囊，佢戴上口罩、束住辮仔，表現從容不迫，面對在場十多位傳媒，學友似乎知傳媒想問一下，大女Zoe與外籍靚仔Mathis傳拍拖一事，學友主動同傳媒講：「不如我哋行埋一邊傾，唔好阻住啲人。」

學友今日現身機場，對於大女瑤華攬外籍男，學友就話佢哋文化係咁樣。

佢企定咗之後，先除下口罩讓在場嘅記者影相，學友話：「大家都係想講關於我大女嘅事，首先多謝大家關心，我當然有了解，亦都知道個男仔係讀另一間學校嘅學生，至於喺社交媒體上面見到佢(男仔)話結婚，其實係一個遊戲嚟囉，相信大家都可以想像得到，佢都係一個17、18歲嘅男仔，嚟緊都要升學，同埋個男仔同囡囡都唔係好熟嘅朋友。」

講到囡囡喺相中攬住個外籍男仔影相，學友就話：「大家喺個男仔嘅facebook都見到呢張相，個男仔其實喺學生界都好出名，除咗係model，佢都有設計服裝，喺佢哋個朋友圈子中都幾出名。」學友指之前冇見過囡囡呢張相，不過見到傳媒咁講，就睇吓呢幅相都留言到句" I love u more"，其實自己平時都係咁同個囡講，學友又話：「呢個係佢哋文化上面，佢哋通常都係咁講，講love you好似講bye-bye咁，對於我嚟講，就冇咩特別，因為我自己都係咁同個囡講。」

學友又主動講行山嗰張相，嗰個男仔就係同囡囡同一間學校，巧合行山撞到就影張合照，學友代囡囡解釋：「而嗰張相好耐之前，我都見過。」  

學友話自己都有就呢件事，去了解一下。