【20年冇喺紅館開四面台】55歲張學友開20場個唱 未知會否跨年
蘋果日報 時間 (HKT): 0913 18:49

年屆半百——55歲張學友，將於今年12月喺紅館開20場個唱，今日信用卡優先訂票，最貴飛$980，最平都要$380，黃牛價$980已經炒到$5,180，果然係天王價！

不過學友特別要求每做三場就休息一日，佢話：「希望有足夠休息，令呢20場順利完成同達到我接受水平，希望我可以做到。」

今日學友現身尖沙嘴洲際酒店，宣佈將於12月4日開始、假紅館舉行二十場《A Classic Tour學友．經典世界巡迴演唱會》，記招尾聲，學友獲環球唱片高層張松輝，及陳淑芬丈夫陳柳泉送贈咪高峰，最後學友同一眾團隊功臣同主辦負責人手執能量水晶主持揭幕儀式，宣佈將有24萬觀眾能入場欣賞。

一向對演唱會要求甚高，學友喺兩個月前已經排舞，佢笑言自己唔係郭富城，排舞需要一段時間先上到手，現時經已記晒舞步：「歌曲都不停唱，喺屋企應該將演唱會唱咗有100次。」

問學友咁太太羅美薇係咪聽到熟晒？佢話：「佢都冇乜理。」雖然喺屋企練舞時，囡囡都有睇到，不過學友指囡囡睇睇下都行咗去，佢笑住話：「我冇理，照樣繼續跳，我意志力好堅強，只要有一個人睇我都繼續跳。」

囡囡都未睇過綵排，希望到正式開騷先安排佢哋睇，不過「細佬」張家輝就有探過班睇佢練舞，但學友堅拒畀細佬上台當嘉賓，因為佢演唱會係冇嘉賓位。

張學友今日喺洲際酒店開記者會，今年尾會喺紅館開四面台演唱會。

暫時場數開到十二月二十九日，問到會否加開至跨年？佢話：「呢啲係主辦決定，又要我家人決定，都唔係我講，不過今次係一次過推晒啲場數出嚟，等大家可以揀想睇邊場去買。」對於有人指優先訂飛難買過機票，學友都明白優先訂飛係較難買到，佢透露自己嘅飛債係來者不拒，佢笑住話：「我收咗訂單都係交畀公司，可能係希望靠我把口去講會好啲。」

2011年學友嘅《張學友1/2世紀世界巡迴演唱會》香港站總共開咗二十場，學友叫好友以捐米代替花籃，好多藝人都有嚮應，共透過聖雅各福群會將米捐給有需要者。呢個World Tour喺12個月內觀眾總數達2,048,553人次，打破咗世界紀錄。

1995年學友嘅《友學友世界巡迴演唱會》香港站喺紅館舉行咗34場，仲要開四面台，當時35歲嘅學友又唱又跳，唱《餓狼傳說》時冇索過氣，又可以飊高音，o依家睇返依舊咁震撼。  

此新聞影片：http://www.jackyclub.com/thread-16584-1-1.html

學友全程又唱又跳，歌神地位真係不用置疑。