【四大天王輪住唱？】歌神學友4年冇開騷
聖誕開20場紅館騷唱到跨年
建立時間 (HKT): 0510 18:44

去年學友同製作人陳淑芬決裂

感覺到有陣風…佢返嚟喇!歌神，再嚟料啦…呢次係張天王學友發功，香港歌迷有福嘞，天王排隊開演唱會呀！

繼黎明4D演唱會喺核心內、外圍完勝後，已經4年冇開騷嘅歌神張學友，強勢宣告今年展開「A CLASSIC TOUR」巡唱，雖然大會仲未公佈日期，但《蘋果》收到可靠消息，據知學友香港站將喺聖誕假紅館舉行唱到跨年，預計最少開20場，才可以滿足餓咗4年嘅歌迷，郭富城就攞到暑假檔期，劉德華亦傳有意明年開騷，至於台灣天王周杰倫，據知已攞到明年初嘅紅館期。

去年學友同製作人陳淑芬決裂，兩人因學友入行30周年演唱會意見不及，陳淑芬申請咗去年4-5月紅館檔期給學友開騷，但最後個唱擱置，學友承認同陳淑芬有分歧，演唱會交畀環球負責；今日環球宣布學友啟動「A CLASSIC TOUR」巡唱，呢次演唱會對學友嚟講係一個意外驚喜，因為完成「1/2世紀演唱會」後，學友懷疑自己仲可唔可以做呢種又唱又跳嘅表演？佢喺評估過體力同身體狀況後，終於決定再挑戰自己。

出名唱得嘅學友，單係自己唱歌嘅部份，就已經練咗幾個月，學友笑住話：「如果你呢次嚟看演唱會，只係聽我唱歌，咁應該係冇問題嘞。」從開始籌備演唱會到o依家，開會已經快接近20次，經歷3個多月嘅時間。至於今次個唱會唔會突破紀錄？學友話：「能夠做演唱會，喺台上為大家唱歌跳舞，已經非常感恩，因為呢啲都係我最愛做嘅，破紀錄從來唔係我嘅目標。」

上次學友舉行「1/2世紀演唱會」於2010年開騷，足足唱咗18個月，直至2012才完成第146場演出，創下華人歌手單次巡迴演唱會嘅場次新紀錄，並以12個月內觀眾總數2,048,553人次打入健力士世界大。
此外，問到華仔係咪計劃明年開紅館騷？其經理人公司回覆：「一切未知數。」