第5度提名自嘲習慣失獎
學友暗藏影帝夢
2016年04月01日 蘋果日報

■張學友自言得獎機會平平，難得是屢敗屢戰的精神，值得嘉許。攝影：陳志嵐

【第35屆香港電影金像獎　男主角篇】張學友，在樂壇上地位超然，更有「歌神」的稱譽，但自89年憑《旺角卡門》中的「烏蠅」拿下過一座金像獎最佳男配角後，先後4次獲提名影帝，但比數依然是0比4，跟獎項無緣。今年再接再厲的學友，憑《暗色天堂》跟林嘉欣雙雙入圍後日舉行的第35屆香港電影金像獎最佳男、女主角提名。縱使周潤發等巨星半開玩笑，叫其餘參賽者讓座，自言輸慣、第5度爭影帝的學友雖然表現灰心，但受訪時閃爍過一絲爭雄的決心。
撰文：曹家誠

電影《暗色天堂》為張學友帶來第5次的最佳男主角提名，戲中拍檔是繼2002年由許鞍華執導的《男人四十》後再度合作的林嘉欣，兩人在當年的頒獎禮同獲提名，結果首度踏足金像獎的嘉欣就成功掃走最佳新演員和女配角，而本來呼聲甚高的學友就敗在《少林足球》的周星馳手下。

學友跟嘉欣相隔13年再度攜手合演《暗》，角色亦由當年《男》中的悲涼小人物角色，轉變成《暗》內一位身兼跨國慈善機構的CEO和教會牧師雙重身份的複雜角色，跟下屬兼教友的嘉欣產生情愫，不料竟因一吻而導致身敗名裂。故事由莊端岩的舞台劇《法吻》改編，題材偏鋒大膽，亦因而成功令學友和嘉欣雙雙獲得本屆男、女主角提名。

■曾經贏過金像獎最佳男配角的學友，能否再進一步稱帝後日便有定案。

盼嘉欣攞大滿貫
事實上早有不少聲音指學友的演技一直被低估，就連有份客串《暗》的黃秋生，早前公開放聲氣希望學友和嘉欣可以憑同一套電影獲封影帝影后，締造歷史。對於外間的支持和期望，學友先大讚嘉欣：「獎項嘉欣攞過好多，亦攞到慣晒，我哋仲拍緊呢套戲嘅時候，佢已經攞咗金馬獎，其實我都想佢攞女主角，如果係就有齊香港、台灣兩個大滿貫（女主角、女配角、新演員），到時就係打麻雀食雙辣。」

兩人都為金像獎的最佳男、女主角作零的突破，但學友卻大力唱淡自己：「如果冇記錯嘅我（今次）都第5次提名，但從來都冇嘅，我都好慣，即係冇乜希望嗰個慣，所以我希望嘉欣可以得，咁樣先係一將功成萬骨枯。」

學友言詞間帶點無奈，但能清晰記得男主角參選次數，多少都代表他重視該獎項，他又認為獎項是要講運：「首先由決定接呢套戲，到一直拍嘅時候都冇企圖要憑電影得到啲乜嘢，而且攞獎好講命，攞開就會繼續攞，一路都攞唔到肯定有理由，可能我唔太啱評審口味。」

提到其他對手，學友稱只曾看過劉德華的《失孤》和張家輝的《陀地驅魔人》：「即使係《暗色天堂》，我連真正嘅戲院版都未睇，郭富城嘅《踏血尋梅》同梁家輝嘅《智取威虎山》又未睇過，所以邊個會贏嘅成數唔知，不過我有興趣睇晒咁多套提名作品。」即使連「細佬」張家輝的勝數亦不肯預測？學友笑說：「我認為佢似乎對新晉導演嘅野心大啲。」

■學友跟林嘉欣憑《暗色天堂》分別入圍最佳男、女主角。劇照

遺憾導演冇提名
對勝算似毫不在乎的學友，不停讚劇組表現出色，又替導演袁劍偉（Steve）感不值，他說：「我始終覺得導演冇得入選係一個遺憾，真係好可惜，坦白講我近幾年拍過好多新導演嘅作品，比較其他拍過好多戲嘅導演之下，Steve嘅拍攝準備工夫好充足，現場應變處理成熟，講古仔嘅方法又有自己風格，雖然贏唔贏到係另一件事，但佢冇提名新導演我係覺得好意外。」

化妝：Julie Hui
髮型：Herman Law of ii
場地提供：香港萬麗海景酒店

最佳男主角提名名單
劉德華《失孤》
張家輝《陀地驅魔人》
梁家輝《智取威虎山》
張學友《暗色天堂》
郭富城《踏血尋梅》