一晚喊兩次        千嬅震住同學友合唱
蘋果日報 建立時間: 0129 17:00

楊千嬅自爆最初唔敢搵學友做嘉賓，又話：「我今日好開心呀！當年我哋參加新秀，個個報名都唱學友嘅歌，我都揀咗〈李香蘭〉。」

楊千嬅尋晚開第五場騷，雖然佢係喊包，不過尋晚一晚喊兩次，認真誇張。第一次係唱〈笑中有淚〉時突然嗚咽唱唔到，第二次係同嘉賓張學友合唱後，呢個水瓶座真係喊唔停。

張學友先係獻唱〈還是覺得你最好〉，然後與千嬅手拖手合唱國語歌〈你最珍貴〉。千嬅都話：「我好緊張呀，我練咗呢首歌兩個月啦！」千嬅仲爆料，指老公丁子高是學友粉絲：「我老公仲緊張呀！呢首歌對我哋好有意義，因為係當年結婚時嘅合唱歌！今日好多謝你（指張學友），我覺得好amazing！」難怪過往四場騷都坐VIP位嘅丁子高，尋晚坐第一行，要近距離欣賞老婆同偶像學友合唱啦。

學友就話：「其實我以前都以為千嬅傻傻哋，但之前我搞咗阿梅個騷，由開始打電話畀千嬅到做完個騷，叫佢做乜，佢都話『好呀』、『OK』。令我非常非常感動。我覺得千嬅應該擁有一切最好，因為佢係個好人。」估唔到歌神唱歌掂，原來把口仲掂！

觀看新聞影片請點：http://www.jackyclub.com/thread-16045-1-1.html