[轉貼]賽車手與張學友演全武行直奔北京

[複製鏈接]

金幣: 331
註冊時間: 2003-1-26

1樓

YQ 2003-7-24 19:24

分享到：

轉貼自友友俱樂部byJC Fan

明周984期 1987年9月20日

賽車手與張學友演全武行直奔北京

學友仔撞車後涉嫌被毆，而今係人都知。不過，他所撞者何方神聖？相信很多人也不大了了。
據本刊知悉，對方乃一賽車高手，姓陳名偉敏的，有報紙因此而報道學友仔與陳惠敏撞出火，乃音誤所致，此敏非彼敏，不過據說論身材之大隻程度，此敏不弱於彼敏也。在當晚與學友撞出火後，阿敏已駕一跑車直奔北京，參加港京拉力賽去矣。
又問，何以此敏如此火爆？引起一場「拳擊」事件？

四十萬名車傷屁股
筆者不便評論，不過，筆者所知，學友涉嫌撞及仔之車，乃一名貴單門房跑車，「高士和夫」牌是也。此車時值四十萬，現今全港不超過十部，老牌賽車手潘炳烈便揸此種車。當日此敏之「高士和夫」落地不到七日，成架新車簇簇，結果是晚尾部份全部爛晒，泵把尾燈粉身碎骨，四十萬元唔見一橛，想唔心刺都幾難。再加上此「高士和夫」在本港曲高和寡，零件難找，其狼狽情形可見一斑。
然則講開又講，郁手郁腳則大可不必，邊個先郁邊個後郁，邊個口郁邊個手郁，邊個有郁邊個冇郁，現今筆者均不便亂講，因該案己報上差館，他日自有法宫大人明察。此處可聽羅美薇對筆者之口述 ─
當晚我去完張國榮之生日會，學友送我及另一位朋友返家，時維凌晨時分，天雨路滑。忽見有車高速閃出，學友刹車不住，於是「火星撞地球」。

羅美薇無計可施
學友是未有下車，由那位朋友出面應付。惟有人瞥見車內所坐之人是學友，便大喊︰「歌星大晒呀？」定要學友下車。之後彼此言語間有所撞衝，(據另一版本，有人當時謂︰「你想屈我俾錢呀？我一個電話，就要你瞓低﹗」)此時，有人心口中拳，有人肩膀被推，隨後，有人說︰「我去報警。」我和學友等便原地不動，等候裁決。
未幾，有四條大漢掩至，瞬息間學友頻頻中招，而是時我在旁無計可施，也無力援手，只得在旁苦苦相勸，求數位大漢不要打學友。惟所有人當我冇到，我只好眼光光目睹此一幕。
幸而恰巧有廵警經過，對方三人及我方三人一起被請去差館(對方二人在混亂中離去)，稍後，學友仔被送進醫院，我便在差館錄口供﹔最後，所有人接受警方問話離開差館，我便趕往醫院探學友。
學友當時腹部受創，都傷得幾犀利。不過即時照過X光，却看來又冇大問題。當日我陪學友到天光，約十一點時分，我有事離去。

一大堆中藥待吃
上述乃阿May口述之當日事發過程，內中火爆之對白和動作部份，為免影響裁判公正，筆者不便詳細報道，留待判決後，若各位有興趣，筆者可以當講古仔咁講。
好，說回羅美薇。筆者問她︰「學友中招，你有否煲番D湯水俾他補補身子呀？」
阿May云︰「冇呀，因為佢而家好多嘢食。」我問他食些什麼，「中藥囉﹗」阿May道，「好多藥食都食唔晒，費事堆埋一齊俾佢食啦，到佢以後好咗先講。」
我謂︰「聽講學友揸車，成日撞車，係唔係咁牙烟呀？」
阿May速速搖頭︰「邊度係﹗我坐佢咁耐車，先正撞過一次咁多﹗不過，成日擦花架車就真﹗」
成日擦花架車，其實亦不可謂不「牙烟」。是以我追問︰「然則，你坐學友架車，有冇安全感先？」
「有﹗」羅美薇一口咬定，坐學友仔架車好鬼安全，「佢揸車其實好定，不會左搖右擺，我都唔之幾有信心﹗」

情人眼裏出車手
「撞過一次都唔怕？」
「唔怕﹗怕什麼？濕濕碎啦。果晚天雨路滑，係人都會撞車架﹗」
真是冇佢修﹗「情人眼裏出車手」，我相信莫說張學友開眼揸車﹔即使他瞇埋眼揸車，阿May一樣覺得好有安全感。
講到此處，阿May發現自己可能講錯嘢，補充云︰「或者我係新牌啦，所以我其實唔識睇揸車揸得好唔好。反正如果我自己揸車，我開三十咪，都緊張到成身汗﹔但一坐上他人的車，就充滿安全感……」
呢句話正是打低自己抬高別人，我相信她是講俾學友仔聽既 ─ 你放心接我送我啦﹗總之你揸車撞成點，我一樣有冇怕﹗

PS 我想由此時開始香港媒體對學友的風評便不大好,那時我還很小,只有十歲，我也覺得這個人是不是出了什麼問題，因為報導一面倒差下去。