【台北直擊】三大天王錄短片 賀學友出碟 哈林捧歌神做「歌佛」
蘋果日報 時間: 1222 19:05

(攝影：馬建華)(蘋果日報)

歌神張學友相隔七年，再推出國語專輯《醒着做夢》，明天（23號）正式全球同步發行。學友今日喺台北文華東方酒店，舉行盛大記者會，一出場時，唱新歌《時間有淚》，仲係全球首唱，而音樂監製杜自持伴奏。

學友上台好風騷，不停搞笑又搞gag，而黃子佼擔任大會司儀。講到今次大碟budget，黃子佼知道budget好高，問學友係咪用晒環球下半年預算？學友台上笑言：「我知錯了。」

問到是否貼咗幾多錢？佢話：「我的嗎？早知省錢一點去做，平時已經好節儉，衫都不多買。」黃子佼再追問係咪八位數字？學友則不願多講，仲鬧着玩叫黃子佼「下去下去。」（意指下一條問題）

學友新碟明天全球同步發行，亦破了itune紀錄，就係有116個國家，明天同步喺itune買到學友新碟；另外，台上有隻珍珠戒指，原來係紀念學友入行30年，亦係佢同環球音樂結緣30年，當係「珍珠婚」。

另外，環球方面搵嚟學友30位圈中好友錄片恭賀，包括三大天王劉德華﹑黎明﹑城城﹑仲有林憶蓮，自認學友表妹的吳君如﹑嗌學友做二哥的張家輝﹑吳宇森﹑徐克﹑志偉﹑譚詠麟﹑梁家輝﹑梁朝偉及湯唯等。而最後一位係祝賀學友的，亦係學友最好朋友庾澄慶（哈林），哈林另外錄一條片，做埋後期製作，情況似音樂比賽，哈林聽完學友首歌，突然拍前面按鈕大叫：「I want you」，仲叫歌神加入佢個team，捧佢做「歌佛」。

佢又話學友《用餘生去愛》，但係用庾澄慶個庾，認真搞笑。學友表示一次過睇完三十位朋友短片，感激環球工作人員，知道佢哋碌爆人情咭及搵方法錄返嚟，尤其對三天王出現，令學友感意外，佢話唔知自己有幾多朋友，但敵人都唔多，而錄嗰三十位朋友當中，相信冇一位當佢係敵人。

黃子佼擔任大會司儀。


台上有隻珍珠戒指，原來係紀念學友入行30年。




環球方面搵嚟學友30位圈中好友錄片恭賀。