【嘉賓王嚟喇】學友任鄭秀文個唱嘉賓兼播激嘴照
【嘉賓王嚟喇】學友任個唱嘉賓兼播激嘴照Sammi：我細個咁open嘅？
蘋果日報 時間: 1229 14:45
張學友任鄭秀文個唱嘉賓，現場仲播放當年佢哋喺戲中激嘴照，嘩﹗
噚晚鄭秀文（Sammi）喺紅館舉行第八場個唱，除咗許志安﹑周慧敏及吳雨霏捧場外，表演嘉賓就有嘉賓王之稱的歌神張學友出場，全場震憾。
Sammi蹺實學友行完舞台上「紅地毯」後，就笑對第一排觀眾表示：「係咪9800蚊張飛都好抵睇呢？」佢又指學友逢騷必到，有求必應，封佢做「樂壇慈父」。
其實學友同Sammi早年合作過電影《飛虎精英之人間有情》，兩人仲喺戲中有咀嘴場面，Sammi笑說：「我同你拍第一集電影，不過好少人留意，如果大家翻睇請留意我當年碌大髀!」
學友表示：「好厲害，唔知點解你啲Baby Fat真係好奇怪，Baby咗幾廿年，突然之間冇晒!」Sammi反擊：「咩突然間，我好盡力咁減架!」跟住現場播出學友同Sammi喺電影中咀嘴照，全場嘩然!
Sammi同學友你一言我一語，非常搞笑，Sammi大叫：「嘩，好open呀，我細個做乜咁Open嘅，拍埋呢啲三級片？（你睇你畀我揸住啲頭髮，幾激!）學友，我就送咗螢幕初吻畀你啦，好滋味啦，lam晒咀咁樣!（好正呀，同埋嗰陣時夠肉呢！）咩意思呀？!」
學友講得興奮幾乎踩到Sammi條裙腳，佢笑言：「唔好踩到我條裙啦，着完要還呀!」Sammi又話：「你送咗隻碟畀我，仲簽埋名嘅，但我有啲氣忿難平喎，揸住隻碟時鼻哥窿出煙。」
學友問佢點解？Sammi就話因為明明有好啲版本嘛，又有靚聲版。學友聞言再話：「你嗰張喺德國印，另一款係藍光版，要擺落電視機，我一套送晒畀你！」Sammi就話：「我買咗啦!（真定假？）我去CD舖，有一隻貴啲，我梗係買貴啲啦！」
兩人傾到忘形時，學友再話：「o依？我當咗綵排咁，唔記得有觀眾，喺度傾偈添!」Sammi就話：「得0架。我要同大家講，學友專輯已經出咗啦，我聽咗，好聽到爆裂。（我唔係嚟做宣傳嘅!）我鍾意同你做宣傳呀!咁順便宣傳埋我嗰隻，買學友嗰隻燒肉就搭我嗰隻豬頭骨，買埋我隻碟啦，多謝各位!」全場歌迷報以掌聲。
學友再笑言：「Sammi同我講，你淨係拖我出去，企吓又行返嚟咁就走得。咁我打聽一吓，嘩，古天樂嚟都唱喎？!」Sammi話：「係0架，唔會走出我五指山0架!」學友表示：「如果古天樂嚟唱，我嚟就唔唱咪好奇怪？所以我都要唱呀，咁我問佢想我唱咩歌…Sammi，你落台換衫啦，拜拜!」
學友跟住爆料話：「我先此聲明，我唔係嚟plug歌，因為我做嘉賓好少唱新歌。但佢話真係好想我唱呢首新歌，咁我返去睇吓歌詞就知道點解要我唱呢首歌喎!首歌係講一啲男女經歷咗啲波折，學懂點樣去愛…」
觀眾歡呼，有人大叫「安仔」，學友再話：「所以我知道呢首歌點解感動到Sammi!」然後學友獻唱《用餘生去愛》。
Sammi學友老友鬼鬼，喺台上大放笑彈。
頁:
[1]