金像獎專題：雙家輝夾擊發哥爭影帝→chiasan 於 2011-04-12 18:25:45
發表者： chiasan 於 2011-04-12 18:25:45 (484 人閱讀過)2011年04月09日 香港蘋果日報
【第30屆金像獎之男主角篇】今年的香港電影金像獎男主角提名名單，看似風平浪靜卻又暗藏殺機。周潤發、梁家輝兩位影帝級人物，均以傳記片獲提名，前者重塑孔子的聖人形象，後者則演活李小龍父親李海泉的慈愛，受角色所限，他們的演繹有一定難度。反而同屬影帝級的張家輝在《綫人》中發揮有更大自由度，而屬於新丁級數的謝霆鋒，以游走於正邪之間的角色，挑戰人性陰暗的表現，或可以黑馬身份挑戰三位影帝級對手。撰文：陳月媚
最佳男主角提名
周潤發 《孔子決戰春秋》
梁家輝 《李小龍》
張家輝 《綫人》
謝霆鋒 《綫人》
張學友 《月滿軒尼詩》
第三十屆香港電影金像獎頒獎典禮於本月 17日舉行，五位實力派男星入圍角逐最佳男主角殊榮，包括《李小龍》的梁家輝、《孔子決戰春秋》的周潤發、《月滿軒尼詩》的張學友、《綫人》的張家輝和謝霆鋒，不少電影人都覺得今年的影帝候選人沒有一個特別突出，甚難評選，但若以一般人口味作準則，還是看好張家輝可再封影帝。
前年張家輝憑林超賢執導的《証人》贏得香港金像影帝，他扮演愛妻如命卻又兇殘無比的單眼綁匪，其細膩精采的演繹，令大家對他連環封帝都心服口服，今次他乘勝追擊再與林超賢及霆鋒合作，演出延續篇《綫人》，角色由綁匪變成高級督察，由於角色的可塑性甚高，其演出是相當到位，雖然沒有上次《証人》這麼搶眼，但仍然會令人對他的演出留下深刻印象。
對於自己能否再下一城，張家輝不諱言謝霆鋒有黑馬的潛質，他日前接受訪問時說：「其實機會係五分之一！所有對手都係好戲之人，要贏唔係咁易嘅！發哥都咁耐冇喺香港提名，絕對唔可以忽視，梁家輝同學友一樣係好戲之人，家輝仲攞咗唔止一次。至於霆鋒，我同佢同時憑同一部戲提名，講真霆鋒表現比上一部《証人》明顯有進步同成熟咗，佢都係我勁敵。」
問到張家輝對自己演出《綫人》有甚麼評價？他笑言：「評價就交畀大家啦！上次嘅角色因為係反派，角色比較單一，容易掌握，但今次做警察，角色複雜好多，其實演出更加有難度，我都唔知自己有冇機會再攞獎，以平常心去面對囉！不過我諗差不多到頒獎禮時，自己又會好似上次咁緊張，一定會感到壓力。」
鄭思傑：黑馬揀霆鋒
在今屆電影金像獎獲多項提名的《打擂台》導演鄭思傑，對於最佳男主角的心水演員，有一番見解：「由細到大周潤發都係我偶像，所以一定選佢，無論佢做乜角色都會覺得會係佢贏，冇得計，而且發哥好戲就係人都知。另外一個黑馬心水我會揀霆鋒，同佢合作過《 2002》嗰陣就已經覺得佢係一個好難得嘅演員。」他又以足球作比喻說：「霆鋒俾人睇淡，好似你睇曼聯、皇馬成日贏，都想睇吓啲弱隊好似黑池會唔會有出頭。事實上佢喺《綫人》嘅演出確實唔差。」
學友角色難演
《打擂台》的另一位導演郭子健表示跟拍檔的選擇不同，自己則看中《月滿軒尼詩》的張學友，他說：「張學友演得好平實，而佢嘅角色因為太平淡變相好難演，但佢都處理得好好。」他表示學友演過蠱惑仔、奸角甚至好卑微的角色，但沒有今趟具挑戰性，他補充說：「佢已經係一個有家室嘅人，以一個成熟男人再去演回一個吊兒郎當嘅電器店少東，依然做到恰如其份。」導演彭順亦看好張學友，他說：「學友係好有潛質嘅演員不過未爆出嚟啫，喺戲裏面完全唔覺佢做戲，感覺好舒服同自然，睇完《月》之後好懷念佢喺《阿飛正傳》嘅表現。」
撰文：魯萍、何永寧
張家輝《綫人》
三個影帝級人馬爭獎，當中以張家輝的角色發揮空間較大，被看高一線。
http://hk.apple.nextmedia.com/images/apple-photos/apple/20110409/small/09ed1p2n.jpg' align='left
周潤發《孔子決戰春秋》
http://hk.apple.nextmedia.com/images/apple-photos/apple/20110409/small/09ed1p3n.jpg
梁家輝《李小龍》
http://hk.apple.nextmedia.com/images/apple-photos/apple/20110409/small/09ed6p444n.jpg' align='left
導演鄭思傑（小圖）認為霆鋒演出認真，故視他為黑馬之選。
http://hk.apple.nextmedia.com/images/apple-photos/apple/20110409/small/09ed6p666n.jpg' align='left
張學友在《月滿軒尼詩》中的演出看似平淡，實為演技大挑戰。
http://hk.apple.nextmedia.com/images/apple-photos/apple/20110409/small/09ed6p555n.jpg' align='left
頁:
[1]