四大天王襲2011 期待全家福開騷→於 2010-11-15 09:14:12
發表者： jacky 於 2010-11-15 09:14:12 (1362 人閱讀過)四大天王襲2011 期待全家福開騷 36%被訪者想睇華仔拖華嫂冧歌迷
星島日報
2011年仍未展開，紅館檔期已被各大歌手爭奪，當中最能惹起樂迷注意的，是四大天王將在這年輪流登場！自90年代開始稱霸樂壇的黎明、劉德華、張學友及郭富城，難得20年後仍屹立不倒，繼續開騷，足以反映4天王實力非凡，但同時又令人慨歎樂壇後繼無人。到2021年，若然又出現四大天王爭開紅館騷的場面，我們應該高興還是慚愧？
四大天王的崛起，正值香港樂壇的美好時光，一眾歌手百花齊放，魅力旗鼓相當，歌迷又肯花錢力撐偶像，不似現在的口說支持，實則已在電腦前「係咁下載」，足證Fans是上一代的最夠忠誠。廿年過去，歌迷仍義無反顧地追隨偶像，2011年的紅館騷檔期中，原來最轟動都是四大天王，率先登場的，會是華仔的跨年演唱會，由今年12月20日唱到2011年；至於學友會預計在4月中舉行世界巡迴香港站的演出，暫定20場；城城則打算壓軸開騷；而黎明仍未決定確實日期，但同年有4個天王開演唱會，確實是「九十前」的歌迷之福。
既然位位都是紅足廿年的天王，各人自有獨到之處，Fans睇騷亦會對號入座，有人想睇勁舞雜技，有人想重溫金曲，也有人專吼6塊腹肌，到底市民又會如何選擇？在他們眼中的天王個唱，是否吸引力如昔？本報為此訪問了50名市民，查詢他們對明年天王開騷的各項意見，結果如下——
第1位，郭富城，得票率28%。被譽為「舞台王者」的城城，有不少被訪者都覺得他的演唱會會最扺睇，除了勁舞是他的強項外，市民都十分欣賞城城騷的舞台設計、歌衫以及特技，「最記得當然係佢個識得360度旋轉嘅舞台，城城喺上面好驚險，似足馬戲班雜技表演，抵睇呀！」也有市民情迷他的出位舞衣，最經典當然是倒轉三角褲的肚兜，「幾百蚊睇天王除衫露出6嚿腹肌，夠吸引吖！」城城不但跳舞勁，無人可替代，他的舞蹈編排有時亦設計得甚有心思，「最鍾意嗰隻濕身舞，佢跳到濕晒之餘，連台下嘅觀眾都整濕埋，好抵死囉。」
第2位，劉德華，得票率26%。華仔的票數跟城城相當接近，因為今年華仔會橫跨聖誕和元旦演出，一齊與天王「蒸糕Bell」完又可玩倒數，贏盡熱鬧氣氛，有市民表示睇聖誕燈已覺悶，到時代廣場倒數又嫌逼，最好節目莫過於在紅館湊熱鬧，加上今年是華仔出道30周年，演唱會上必定會唱好多他的經典金曲，對上了年紀或老一輩歌迷最有吸引力，加上華仔自知舞蹈一向是他最弱一環，今次開騷前不惜重金禮聘米高積遜和麥當娜的排舞師為他特訓，市民期待會令人耳目一新。
第3位，張學友，得票率22%。歌神開騷，最令人期待當然是聽靚歌，加上學友上一次的香港個唱已相隔了3年，歌迷自然引頸以待，只可惜學友近年新歌不多，即使有亦不算大熱，懷舊金曲就順理成章做了主打，但缺點就是局限了歌迷的入場意欲。
第4位，黎明，得票率20%。黎天王近年升呢做了老闆，他開騷相信一定膽拖衞蘭，伴舞例牌是Janice Man，是一大賣點，加上暑假捧出一個靚聲小天后JW，吸引力必然大增，「如果佢叫埋衞詩上台就更爆，因為大家都等睇佢重返舞台，不過唔知黎老闆會唔會畀會佢翻身？」
期待天王嫂登場
廿年後的四大天王，當然是成家又立室，市民認為除了向他們致敬外，更想各人的另一半可以成為演唱會賣點。有36%被訪者最想看到「已認妻」的華仔在演唱會上拖太太朱麗倩出場，覺得這位「華仔背後廿多年的女人」既然身分早已曝光，華嫂出來見見Fans都好理所當然，正如早前千嬅的個唱上，她拖實老公見歌迷，還說了句：「梗係要帶佢見吓屋企人（指Fans）啦！」雖是歌迷，但獲偶像的一份尊重，當然冧爆。另外有22%市民想在城城開騷時，有「城嫂」熊黛林出場，始終兩人戀情經常見報卻沒被正式承認，若能在台上公開關係，勢必震撼。至於有14%想看黎明和樂基兒在演唱會上舉行婚禮，原因是俊男配美女，真實的「童話故事」搬上舞台，一定幸福滿瀉。也有8%被訪者希望見到學友與羅美薇的全家福，帶同囡囡一齊上台，一樣浪漫又熱鬧。
你最期待哪位天王在2011年開騷呢﹖
■郭富城 28%
■劉德華 26%
■張學友 22%
■黎 明 20%
■無意見 4%
(訪問以50人作基準)
你最想見到哪位天王嫂上台呢？
■華嫂（朱麗倩） 36%
■城嫂（熊黛林） 22%
■明嫂（樂基兒） 14%
■學友嫂（羅美薇） 8%
■無意見 20%
(訪問以50人作基準)
"廿年後嘅四大天王，梗係最想見佢哋啲老婆仔女啦，話晒我哋Fans都算係一家人嘛……"
林先生︰
「四大天王真係幾勁，紅到今時今日仲可以開演唱會，我會比較想睇郭富城，動感啲。」
梁小姐︰
「喺四大天王入面，如果黎明可以拖實樂基兒上台的話﹐我諗場面應該好令人感動。」
頁:
[1]