2011四大天王紅館輪住唱→於 2010-11-06 11:43:41
發表者： jacky 於 2010-11-06 11:43:41 (464 人閱讀過)2011四大天王紅館輪住唱
2010年11月06日 蘋果日報
四大天王張學友、郭富城、黎明和劉德華明年先後在紅館開騷， fans必大破慳囊。香港唱片市場雖然持續低迷，但未有對演唱會構成絲毫影響，據悉各天王天后繼續為 2011年紅館檔期而爭崩頭。除四大天王中的劉德華，由今年底唱到明年初唱足 18場外，張學友、黎明和郭富城三位天王也準備在紅館開騷，加上溫拿樂隊、林憶蓮、周慧敏、鄭少秋和汪明荃等，歌迷肯定又要大破慳囊。
劉德華將於今年 12月 20日假紅館舉行 18場跨年演唱會「 UNFORGETTABLE CONCERT 2010」，由 2010年唱到 2011年。原來，除了華仔在紅館開騷外，其餘三大天王張學友、黎明和郭富城也準備在紅館開個唱，令明年紅館變得更為熱鬧。
學友 20場勝華仔
張學友明年在紅館連開 20場，是四大天王中最長氣的一個。 資料圖片
據悉，張學友將於明年 4月中在紅館舉行世界巡迴演唱會香港站，暫定開 20場，比華仔的 18場還要勁。記者昨日致電演唱會製作人陳淑芬了解，她表示學友舉行場數多少還未決定，票價方面有待稍後開會研究。除華仔和學友外，黎明和城城也計劃明年踏足紅館，城城計劃明年底檔期開騷，黎明則於 10月之後，有關方面稍後將入紙紅館申請。
除四大天王輪住在紅館開騷外，不少有份量的歌手也準備踏足紅館，包括溫拿樂隊、林憶蓮、林子祥、周慧敏、鄭少秋和汪明荃等，其中今年 8月參與演出「金曲娛樂真經典演唱會」的阿姐，下月再在灣仔會展舉行「荃加福祿壽宇宙最長演唱會」，明年 3月 31日她又與好拍檔鄭少秋在紅館舉行演唱會，比四大天王還要勤力。
王菲轉戰博覽館
另外，據悉林海峰原來曾入紙紅館開口水騷，但最後申請被拒。至於早前在北京復出開騷的王菲，因為紅館檔期爆滿而改於亞洲國際博覽館舉行，暫定明年 2月 26日起舉行 5場，票價最貴為 980港元。
雖然香港唱片市道低迷，但身為演唱會製作人的丘亞葵認為，演唱會在香港仍大有作為，他昨日在電話中說：「唱片業喺香港嚟講唔係咁掂，因為啲人唔需要買唱片，都可以喺其他渠道得到啲歌曲，但佢哋對音樂嘅需求依然大，所以演唱會仍然大有作為，啲人鍾意睇現場，追求現場氣氛，尤其是香港演唱會好抵睇，一般嚟講只係 480蚊一張飛，喺東南亞幾乎最平。喺投資角度嚟睇，演唱會同唱片或者電影相比，演唱會嘅投資比較低，但回報快，所以好多公司都好樂意投資演唱會事業。」
採訪：林妃
群星爭奪 2011紅館檔
劉德華 日期： 10年 12月 20日至 11年 1月 6日 場數： 18場
側田 日期： 1月 場數： 3場
吳雨霏 日期： 1月 場數： 1-2場
溫拿 日期： 2月農曆新年 場數： 6-8場
呂方 日期： 3月初 場數： 3場
鄭伊健 日期： 3月初 場數： 2-3場
蕭敬騰或林宥嘉 日期： 3月中 場數：未定
周慧敏 日期： 3月中 場數： 2場
張智霖 日期： 3月尾 場數： 2場
鄭少秋與汪明荃 日期： 3月 31日 場數： 2場
林子祥 日期： 4月初 場數： 2場
張學友 日期： 4月中 場數： 20場
G.E.M. 日期： 5月 場數： 2場
林憶蓮 日期： 9月 場數： 4場
黎明 日期：未定 場數：未定
郭富城 日期： 12月 場數：未定
頁:
[1]