唱片銷量今非昔比心傷 學友逆境自強愈戰愈勇→雙魚座 於 2004-04-22 14:14:09
發表者： 雙魚座 於 2004-04-22 14:14:09 (294 人閱讀過)22/04/2004 太陽報
張學友的唱片曾有數十萬銷量，對於近年唱片業低迷，他坦言並未心淡，為了不想見到樂壇末落，他還積極參與創作。
口述：張學友 筆錄：陳冬嵐、黃雅詩 攝：莫 瑛
雖然依家唱片市道差，但係我出碟都冇乜大壓力，明知賣唔到以前個數字，壓力只係來自鍾意同唔鍾意。今次全隻碟係我自己寫，算係第一次，聽到人話鍾意，我就好開心，滿足感都大。以前只係負責唱，冇即時滿足感，今次就好早有。如果賣得，就更加證明我得啦！不過依家呢個市場好難有三、四十萬銷量，三、五萬已經好巴閉啦！
我覺得慧嫻唔應該心淡，唔開心係可以理解，冇一個Artist（藝人）係隻隻碟都賣得，唔應該用多少定好壞。亞洲地區有係我創下紀錄，邊會成日破紀錄，氣！依家經濟、娛樂方式都唔同，賣少碟係因為又有盜版又有Download（下載），我可以調節心態，都會勸慧嫻。
從不心淡
我依家算係無求，但係對銷量完全唔耿耿於懷就假！但會以做好碟、挑戰自己做大前提。你問我想唔想挑戰自己銷售紀錄？梗係想啦！但係客觀環境唔許可，咪挑戰另一樣囉！所以今次我負責埋創作，諗深一層，如果個市唔係咁差，我又未必會放開做，得得失失好難講。我由頭到尾都冇對呢個樂壇心淡，只有唔開心。我呢度扎根成長，唔想見到個行業死，佢好，我就愈開心。
近來好多歌手出，好似阿Sam、威利、張偉文等，我認為唔係因為新一批歌手唔掂，例如Twins咁，佢有佢觀眾，而三十歲至四十幾都會聽我歌！係唔同市場問題，呢個情況以前都有，但冇咁明顯，最盛時期，個個都開幾十場，唔只我，仲有阿梅、哥哥，個個開二十幾三十幾場，但係依家，個個都只係開得一、兩場，加上近年多好多搞演唱會單位，佢好勇敢嘗試！其實有Show就自然有人睇。
另外，學友昨日接受電台訪問，提到歌神許冠傑復出，也被譽為歌神的學友說：「咪好囉！咁咪可以叫番我學友囉！我唔介意，都係一個稱讚！」講到如果阿Sam邀請他任演唱會嘉賓，學友當然樂意之至。
學友對樂壇仍未心淡，更參與創作工作，希望唱片有更好成績。
頁:
[1]